《行運一條龍》入面嘅情聖何金水曾經講過，溝女嚟講，最緊要係兩個字，「靚仔」。蔡少芬曾經上過一個大陸節目，被主持人問到同老公張晉平時會唔會嗌交，蔡少芬答：「吵呀，有時候吵架我都想掐死他，可是一看到他這麼帥我就忍住了。」唔通張晉令到蔡少芬死心塌地就係靚仔咁簡單？
（東星娛樂）
蔡少芬同張晉結婚11年，上年意外懷孕，相隔六年終為老公追仔成功，雖然已經係生咗３個嘅「老夫老妻」，不過兩公婆都依然好「煙韌」，不時喺網上曬恩愛，睇到大家都覺得有啲漏呀！
（蔡少芬微博）
今日係張晉46歲生日，蔡少芬就喺網上公開向老公發表愛的宣言，冧爆留言：「親愛的張先生，今年你生日無咩可畀你，只有將我一生最重要的都畀你！就係命都畀你🤣！願你今年生日好好保護好呢三條命！哈。。。。愛你！愛你！好愛你！」之後仲附上佢生３個小寶貝之後影嘅產房相，有云女人每次入產房都係去鬼門關行咗一轉，所以蔡少芬即係足足行咗3轉，所以佢話命都畀埋老公，真係一啲都冇誇張到！
（蔡少芬微博）
張晉都好識得冧老婆，留言：「哇！你為了我連命都不要了，我還說啥，愛就完了！」
（蔡少芬微博）
大家對佢哋頻頻放閃似乎一啲Hard feeling都冇，唔少網民仲留意講笑話佢呢份禮太重，令張晉好大壓力，不過大家都好戥佢哋高興，祝福佢哋永遠都咁恩愛呀！
其實蔡少芬咁冧張晉當然唔係佢靚仔咁簡單啦！張晉經常默默地做一啲窩心嘅舉動，都令到蔡少芬好感動。
（蔡少芬微博）
蔡少芬11年、13年同19年佗兩個女同細仔，三次嘅懷孕老公都細心體諒到老婆挺住大肚剪指甲有困難，主動幫佢剪腳甲，蔡少芬都話不得不自誇自己有個好老公。雖然係一個好細微嘅舉動，但夫妻二人都冇因為習慣咗彼此嘅存在而惰怠；亦冇唔識得感恩對方為自己嘅付出，真係非常難得！
（蔡少芬微博）
雖然育兒係兩公婆嘅共同責任，不過張晉餵夜奶呢一幕都真係令人覺得有啲感動，又或者係因為蔡少芬太愛佢先可以影到張相咁有Feel！張晉冇將湊B嘅責任推晒畀老婆上，呢張一臉溫柔嘅相盡顯佢如山嘅父愛！相信咁愛錫小朋友嘅佢，對老婆都唔會差得去邊！
（張晉微博）
蔡少芬生第３胎嘅時候張晉接受訪問，難掩追仔成功的喜悅：「BB好大隻、好健康。我哋當然係非常之開心啦！ 我哋不嬲冇諗過再有（BB），所以真係要封（封肚）喇，再唔係就我封！」 愛妻心切嘅佢怕老婆再受生仔嘅十級苦難，真係一個超級好老公！
撰文：黃蘊姿